【天罡吸水陣後記】
實驗歷時廿六日，喺香港返到嚟瑞典之後，打開屋企門口後第一件事即刻探測吓現場仲有無生命跡象。我眼見個煲乾晒水都知大煲，就等我逐一報告吓傷亡情況啦。
首先宣告死亡嘅係三棵香草同兩棵薰衣草，已經全完枯乾，相信已經死去一段長時間。香草屍身已經乾到磨碎佢就係平時超市買到嘅入樽香草乾，而薰衣草乾就剪晒落嚟做乾花。
至於兩棵攀藤植物同棵菠蘿，就有一半半葉枯乾緊，但整體嘗可，轉去普通病房得啦。
而三棵平時都係擺室內嘅植物龜背竹、文竹同蘆薈就好健康無走樣。特別係棵蘆薈，從來都無見過佢氣色咁好。反而平時比佢晒吓太陽，得閒淋吓水仲衰，原來佢都係佛系，由佢自己靜修就得。
在場有一個感人嘅英雄事蹟，主角就係棵蕃茄，雖然佢嘅葉同枝幹已經枯乾晒，但依然喺油盡燈枯前，用埋最後一口氣結埋幾粒蕃茄出嚟，將後代生命延續落去。出門前都只係得一粒細嘅綠色結緊，又驚到時結咗果都係會比雀叼咗去。點知啲果結咗喺度又無乾又無壞，前幾日食咗仲幾好味添。
最令我意外，亦係我最著緊嗰棵，就係出名耐寒耐熱耐旱，總之就命硬嘅柏樹，諗住最捱得係佢啦呱，點知成棵都已經黃晒，入咗深切治療部到依家兩個禮拜都未有咩起色。一定要無事呀，仲要做我家傳之樹㗎。
總括嚟講，本身呢個利用毛細管作用嚟吊鹽水嘅民間方法應該係得嘅，但係人算不如天算，呢個七月係瑞典自二百六十年前有記錄以嚟最熱嘅七月，一返到屋企好似入咗焗爐咁。放喺室內個煲已經係全屋最大嘅，容量成五公升唔夠用都無計。
吸收經驗，下次應該要用埋保鮮紙蓋住啲泥同個煲減少水分流失，再用晒全屋嘅煲。不過其實最好係將成個陣搬去廁所，再放個花灑頭入個煲開細細水，咁就有源源不絕水源啦。
咁點解唔直接用洗手盤代替個煲呢？因為天罡吸水陣嘅重點係每條線最好只有兩個接觸點，一點喺水庫一點喺泥土，中間掂到其他嘢啲水就有機會喺嗰度流走，而唔係落晒泥土度。加上唔同植物嘅線最好唔好有交疊，所以地下啲植物都要平均圍住水庫散開，洗手盆多數兩三面有牆擋住，用煲就可以圍個圈。
點都好個水量都係要靠實驗試出嚟，不過要預咗每次都死咁幾棵嘢先，真係幾時先試得啱呀，所以你可能零願開大少少水好過到時唔夠水。改良版天罡廁所吸水陣就算萬一太多水滿瀉都係廁所去水口流走，唯一風險係爆水管水浸嘅姐。
註：請各位有識之士提供打救柏樹之法，感謝！
最後，本來想叫「天罡吸廁所水陣」，不過費事有人會用咗馬桶嚟做水庫。之但係臨㩒出文掣之前諗諗吓，咦！可能用廁所水箱做水庫仲好喎，水箱本身唔夠水就會自動加滿，又有機關截水唔怕滿瀉，不過水箱唔可以用鹹水，同埋最緊要消消毒先囉要。
Search